फूटपाथ : एकटा कोलाज

फूटपाथक एकटा दृश्य

काल्हि दिनांक 06 सितम्बर, 2013 क’ दिल्लीक स्थापित संस्था मिथिलांगनक आयोजनमे जयबाक अवसर भेटल । आयोजन मुक्तधारा प्रेक्षागृह, भाई वीरसिंह मार्ग पर छल । मिथिलांगन संस्थाक वार्षिक आयोजन अछि स्व. व्रजकिशोर वर्मा ‘मणिपद्म’ जीक जयंती समारोह । विगत छ: - सात साल स’ ई आयोजन नियमित रूपे देखबाक अवसर भेटल अछि । संस्था शनै: शनै: एहि आयोजनक गरिमा कम केलक अछि से कहबामे कोनो अशोकर्ज नहि होयबाक चाही । शुरु शुरुमे ई आयोजन खूब धूम धाम स’ दिल्लीक मंडीहाउस स्थित प्रेक्षागृह एल. टी. जी. / राजेन्द्र भवन वाकि श्रीराम सेंटर सन महत्वपूर्ण स्थान पर होइत छल । आयोजनमे उपस्थिति ततेक ने रहैत छल जे बैसबाक स्थान भेटब मुश्किल होइत छल । हलाँकि आइयो हॉलमे सैह हाल रहैत अछि मुदा पहिने हॉलमे पाँच सय आदमी बसैत छल आब त’ हॉले एहन रहैत अछि जे एक सय आदमी आबि जेताह त’ बुझू उग डूब क’र’ लागत । आयोजनमे नृत्य, संगीत आ नाटक तीनू रहैत छल संगहि मणिपद्म जी केन्द्रित छोट छीन संगोष्ठी सेहो होइत छल । हाँ ! ओहि समय संस्था अपन आयोजन सदस्यता शुल्क आ विज्ञापन स’ निकालि लैत छल । मुदा, जहिया स’ ई संस्था मैथिली – भोजपुरी अकादेमीक गोलैसीमे फँसल शनै: शनै: अपन मूल आयोजनक चमक धूमिल क’ लेलक अछि । हम मिथिलांगन के मंच पर एक स’ एक विद्वान के देखने छियन्हि । पद्मसम्मान स’ सम्मानित व्यक्ति सेहो एहि मंच पर उपस्थिति द’ अपना के गौरवांवित अनुभव केलाह अछि । मुदा, आब हिनकर मंचपर अकादेमीक भूतपूर्व सचिव रवीन्द्र कुमार दास सन व्यक्ति के देखि घोर आश्चर्य होइत अछि । मिथिलांगन दिल्ली मे एक स’ एक नीक काज केलक अछि । एक स’ एक उपलब्धि प्राप्त केलक अछि मुदा एखनो अपन आयोजन के निर्धारित समय तक पहुँचब मे साठि मिनट स’ बेसीये पाछू अछि । मिथिलांगक युवा सोच श्री अभय जी, श्री सुन्दरम जी,  श्री संजय चौधरी जीक अनुसार चलक चाहियन्हि । किछु वरीष्ठक सदस्यक लेल निर्णय स’ संस्थाक आयोजन प्रभावित होइत बुझना जाइत अछि ।  अस्तु ।   

 

 मिथिलांगन विगत पाँच छ: साल स’ अपन आयोजनमे मैथिली नाटक जोड़ी अत्यंत प्रसंशनीय काज केलक अछि । अहू बेर श्री मणिपद्म जीक लिखल उपन्यास / कथा फूटपाथ क नाट्य रूपक मंचन भेल । एहि उपन्यास / कथा के नाट्य रूप देलाह अछि श्री प्रदीप बिहारी जी । नाट्य रूप बहुत छिड़ियालय अछि तकरा बहुत हद तक समकालीन बनयबाक प्रयास केलाह अछि निर्देशक ।  नाट्य प्रस्तुतिमे लागल मैथिली रंगमंचक युवा पिढ़ीक उपस्थिति आ हुनक रंगकर्मक प्रति जिजिविशा आह्लादित करैत अछि । संस्थाक पुरान रंगकर्मी त’ मेहनती छथिए मुदा, किछु नव अभिनेता / अभिनेत्री स’ बहुत बेसी आशा जगैत अछि । नाटकमे भाग लेनिहार रंगकर्मी निश्चित रूपे अत्यंत परिश्रम केलाह अछि, हुनका लोकनि लेल एहि क्षेत्रमे उज्ज्वल भविष्यक कामना अछि । सब हमर अनुज छथि आ हम अपन अनुज केँ हरदम आगू बढ़ैत देख हर्षित होइत छी । तेँ हिनका लोकनि केँ सदैव शुभाशीष छन्हि ।

 हाँ ! अपन अग्रजक कार्य प्रणाली पर विचार राखब हम अपन अधिकार बुझैत छी । तेँ भाई संजय जी जे कि एहि नाट्य प्रस्तुतिक निर्देशन केलाह अछि हुनका सँ आग्रह जे युवा रंगकर्मीक शक्ति जे हुनका मिथिलांगन के माध्यमे प्राप्त छन्हि तकर आर बेसी सदुपयोग करथि । हमर विचार अछि जे नाटक मे जँ कास्टिंग नीक स’ कयल जाय त’ आधा नाटक सफल भ’ जाइत छैक । फूटपाथक कास्टिंग मे सुधारक आवश्यकता लागल । नाट्य प्रस्तुति के आरो कसबाक जरूरत छलन्हि । बहुत बेसी बिखराव भ’ गेल अछि । एक दृश्य स’ दोसर दृश्यमे प्रवेश करबाक बीचक समय पर निर्देशक केँ बहुत गम्भीरता स’ सोचक चाहियन्हि । लुल्हाक अभिनय करनिहार अभिनेता अपन पात्र खूब नीक जेना जीब रहल छल ओहि पात्रके पहिल दृश्य मे मुँह खसबाक’ ओकर मुखाभिनय स’ प्रेक्षक के बंचित नहि करक चाही । आन्हर के अभिनय करनिहार अभिनेता भाई संजय जीक संग विगत कतेको साल स’ काज क’ रहलाह अछि । एहन वरीष्ठ अभिनेता पर निर्देशक के विश्वास राखक चाही । हमरा जनैत ई अभिनेता बिना चश्मा के अपन पात्र बेसी नीक जेना प्रभावी बना सकैत छलाह । बिना चश्माक अभिनय एहि स’ बेसी कठिनाह आ अभिनेताक लेल बेसी चुनौतीपूर्ण रहितन्हि । युवा अभिनेता रोहित जे नेताक भूमिका मे छलाह, हिनक अभिनय पक्ष बहुत मजबूत छन्हि, सम्भावनाशील छथि । रोहित नेता स’ बेसी फिट युवा क्रांतिकारी लड़काक भूमिकामे होयतथि । वरीष्ठ अभिनेता भाई केशव जीक संवाद अदायगी खूब नीक छनि जँ हिनक संवाद अदायगी मे नाटकीय तत्व आ शारीरिक संचालन के मिश्रित कयल जाय त’ मैथिली रंगमंच पर एकटा सशक्त चरित्र अभिनेताक उपस्थितिक संभावना अछि । राजेश कर्ण, मुकेश दत्त आदि त’ सशक्त अभिनेता छथिए । सुश्री कल्पना मिश्रा सन सशक्त अभिनेत्रीक उपयोग ओहिना कयल गेल जेना आजुक हिन्दी फिल्म मे कोनो आइटम डॉंस राखल जाइत अछि । जखन कि नाटक एकर माँग नहि करैत अछि । अपन बढ़ैत उम्रक कारणे सुश्री कल्पना जी अपन नृत्य संचालन आ संरचना मे नीक जेना ओझराय गेलीह आ नृत्यक बादक संवाद प्रेषित करबा काल बहुत बेसी हाँफ’ लगलीह जाहि स’ हुनक संवाद आ अभिनय दुनू मर्माहित भ’ गेल । एहि सशक्त अभिनेत्रीक उपयोग अभिनय मे करब बेसी उचित रहिते । हाँ ! साक्षी मिश्रा सेहो प्रभावित केलीह । हिनका स’ सेहो आर मेहनत कराओल जा सकैत छल । मिथिलांगनक ई टीम त’ मजबूत अछि ताहि मे कोनो संदेह नहि ।      

 

एकटा निर्देशक रूपमे संजय भाई फूटपाथमे बहुत विन्दु पर अपन रंगकर्मी स’ चर्चा नहि केने छलाह शायद समय के अभाव भेल हेतन्हि । जेना कि नाटक शुरु होइ स’ पहिने उद्घोषणा कोना हेबाक चाही / दृश्य समाप्त भेलाक बाद कोन अभिनेता किम्हर निकलताह / नाटक समाप्त भेलाक बाद कोना पात्र परिचय होयत आदि आदि । एक - एकटा विंदु पर चर्चा आ विमर्श आवश्यक होइत अछि । खैर... नाटक कोन प्रेक्षागृहमे यानि कतेक पैघ मंच पर भ’ रहल अछि तकरे अनुरूप मंच विन्यास आ दृश्यमे पात्रक उपस्थित होयब सेहो निर्देशन लेल आवश्यक होइत अछि । मुक्तधारा बहुत छोट मंच अछि जाहि पर पात्रक संख्या बहुत बेसी भेने पात्र अपन अभिनयक बारीकी देखेबा मे असमर्थ भ’ जाइत छथि । भाई संजय जी केँ अपन प्रकाश योजना पर सेहो ध्यान देब आवश्यक छन्हि । प्रकाश परिकल्पना आ एकर संचालन बहुत तकनीकी पूर्ण विधा अछि । एहि काजमे भाई अपना के नीक जेना सहज नहि क’ पबैत छथि । भाई सुन्दरम जीक हम प्रसंसक छी । खूब नीक स्वर छन्हि, मुदा हिनक उपयोग सेहो संजय भाई बैलेन्स रूपे नहि क’ सकलाह अछि ।

भाई संजय जी लग बहुत मजबूत आ कर्मठ टीम छन्हि । एहि टीम संग एक स’ एक सुगठित प्रस्तुति कयल जा सकैत अछि । एहि स’ पहिने संजय जी एक स’ एक नाटक निर्देशित केलाह अछि जाहिमे हिनक सबस’ नीक प्रस्तुति छल छुतहा घैल । भाई स’ ओहने नाट्य प्रस्तुतिक अपेक्षा अछि हमरा सबकेँ ।

दिनांक : 07 सितम्वर, 2013